Dómnefnd á vegum Þjóðleikhússins tilkynnti nú um helgina að Hringurinn í flutningi Leikfélags Kópavogs hefði verið valin Athyglisverðasta áhugaleiksýning ársins. Félaginu hefur í kjölfarið verið boðið að sýna Hringinn í Þjóðleikhúsinu í júní. Í umsögn dómnefndar segir m.a:

"Leikfélag Kópavogs sýnir skemmtilega dirfsku í verkefnavali sínu en Hringurinn eftir Hrefnu Friðriksdóttur er óvenjulegt og frumlegt nýtt íslenskt leikrit. Leikstjórinn Hörður Sigurðsson og leikhópur blása svo lífi í þann lítt hversdagslega heim sem höfundur dregur upp mynd af í verki sínu. Við hverfum inn í furðuheim sirkussins þar sem spurningamerki eru sett við ýmsar viðteknar hugmyndir okkar og leggjum ásamt aðalpersónunni í ferð í leit að leyndarmálum fortíðar. Í meðförum Leikfélags Kópavogs verður þessi ferð full af spennu og ógnum, en jafnframt hugljúf og nostalgísk, meðal annars fyrir tilstilli tónlistar og myndbandsbrota sem sýna sirkuslífið í fortíðinni. Hinn sjónræni þáttur sýningarinnar er vel unninn og hugvitssamlegur og leikarar standa sig með prýði." 

Sjá nánar hér á vef Þjóðleikhússins. 

Hin geysivinsæla sýning, Hringurinn, var sýnd fyrir fullu húsi í febrúar og mars og komust færri að en vildu. Nú hefur verið ákveðið að efna til aukasýninga vor, sýningarnar verða 3., 4. og 6. maí. Miðapantanir á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. . Þeim sem vilja kynna sér málið betur er bent á stiklu sýningarinnar en hana má sjá hér. 

Evgenía lifir fábrotnu lífi og sinnir tilbreytingasnauðu starfi á opinberri stofnun. Dag einn knýja örlögin dyra í mynd rykfallins lögfræðings. Erindi hans er að greina frá fráfalli föðurins sem hún aldrei kynntist og koma til hennar arfi. Föðurarfur Evgeníu er sannarlega óvanalegur og líf hennar tekur í kjölfarið heljarstökk með tvöfaldri skrúfu – upp frá þessu verður ekkert venjulegt í tilveru Evgeníu. En hvað er annars venjulegt!?

Lesa nánar: Hringurinn – aukasýningar í maí

Unglingadeild Leikfélagsins er kraftmikill hluti starfseminnar og einn sá ferskasti. Þar starfa skapandi og skemmtilegir krakkar á aldrinum 14−17 ára. Deildin er að vakna að nýju eftir dorm frá í nóvember. Eins og komið hefur fram mun Kristín Rós leiða hópinn og viðfangsefnin verða nokkrir sketsar og þættir. Fyrsti fundur unglingadeildarinnar á vorönninni verður þriðjudaginn 10. apríl kl. 17.00. Þeir sem ætla að taka þátt verða að skrá sig sem allra fyrst á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .

Langar þig að spreyta þig á leiksviði? Viltu láta gamlan draum rætast? Viltu taka þátt í liststarfi þar sem sköpunargleðin ræður ríkjum?

Í apríl verður í boði leiksmiðja sem er aðallega hugsuð fyrir nýja félaga með áherslu á byrjendur og styttra komna í leiklist. Farið verður í grunnatriði sviðsleiks og áhersla lögð á praktíska nálgun.
Leiðbeinandi er Hörður Sigurðarson sem hefur starfað sem leikstjóri hjá leikfélögum víða um land en þó aðallega hjá Leikfélagi Kópavogs undanfarin ár og setti m.a. upp Hringinn sem leikfélagið frumsýndi í febrúar.
Athugið að leiksmiðjan er ætluð 21 árs og eldri. Leiksmiðjan hefst þriðjudaginn 10. apríl og verður í 6 skipti fram til 21. apríl sem hér segir: 

Þri. 10. apríl kl. 19.30-22.30
Fim. 12. apríl kl. 19.30-22.30
Lau. 14. apríl kl. 10.00-13.00
Þri. 17. apríl kl. 19.30-22.30
Fim. 19. apríl kl. 19.30-22.30
Lau. 21. apríl kl. 10.00-13.00

Þáttakendur þurfa að skrá sig í félagið og greiða félagsgjald sem er 2.000 kr. Áhugasamir skrái sig með því að senda tölvupóst á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .