Aukasýning á Fróða 13. maí

Aukasýning á Fróða 13. maí

Vegna fjölda fyrirspurna og góðrar aðsóknar hefur verið ákveðið að bæta við aukasýningu á Fróða og öllum hinum grislingunum sunnudaginn 13. maí. Miðapantanir er á vef leikfélagsins kopleik.is.

„Í húsinu á horninu á heima skrýtið fólk …“ – svona hefst upphafssöngur leikritsins Fróði og allir hinir gríslingarnir eftir Ole Lund Kirkegaard sem Leikfélag Kópavogs frumsýnir næstkomandi laugardag. Og þetta er vægt til orða tekið! Í téðu húsi búa m.a. ástsjúkar ungfrúr, geðstirður kall og kátir krakkar sem finna upp á ýmsu sem fullorðna fólkinu finnst að þau ættu bara alveg að láta eiga sig. En þegar skelfileg innbrotaalda ríður er brýnt að allir snúi bökum saman og klófesti þjófinn á hlaupahjólinu! Og þá reynast Fróði og félagar betri en enginn.
Sagan um Fróða og alla hina gríslingana kom fyrst út á bók á íslensku árið 1983. Fimm árum síðar færði Leikfélag Kópavogs söguna á svið í danskri leikgerð, Aðalsteinn Ásberg Sigurðsson þýddi en Valgeir Skagfjörð leikstýrði. Skemmst er frá að segja að sýningin sló í gegn og sýnt var 3–4 sinnum í viku, frá hausti og fram að páskum. Og þótt tjaldið félli um síðir í hinsta sinn lifði minningin um Fróða og vinir hans í bráðskemmtilegum sönglögum Valgeirs Skagfjörð sem gefin voru út á plötum og snældum.
Í tilefni af því að 30 ár eru frá því að Fróði sleit fjölunum í Félagsheimili Kópavogs var ákveðið að kalla fram á ný þetta indæla fólk því kynslóðirnar sem á eftir hafa komið eiga það skilið að kynnast fjöri og ærslum sögunnar, og fá á heilann öll skemmtilegu og grípandi lögin. Talandi um kynslóðir má til gamans geta þess að Örn Alexandersson, sem lék bráðungur ýmis hlutverk í upphaflegu sýningunni, situr í leikstjórastólnum að þessu sinni og með hlutverk Fróða fer 15 ára piltur, Páll Bjarnason, en móðir hans túlkaði hlutverk Stínu, vinkonu Fróða, fyrir 30 árum.
Alls tekur vel á annan tug leikara þátt, bæði unglingar sem starfað hafa með unglingadeild félagsins og reyndari og ráðsettari leikarar. Þá er heil hljómsveit á sviðinu sem flytur geðþekk lög Valgeirs. Sögur Ole Lund Kirkegaards, t.d. Gúmmí-Tarsan, Fúsi froskagleypir, Ottó nashyrningur og Virgill litli – og auðvitað Fróði og allir hinir gríslingarnir – hafa notið einstæðra vinsælda á Íslandi og þykja ávísun á ósvikna skemmtun. Og svo er um Fróða og alla hina gríslingana, hér á ferðinni fjör og fyndnar uppákomur í ómældum skömmtum og því ástæða til að hvetja alla til að rífa sig og börnin upp úr fjaðrasófunum, frá snjall-hinu og snjall-þessu og drífa sig í leikhús og upplifa ærlegt gaman.

0 Slökkt á athugasemdum við Aukasýning á Fróða 13. maí 3809 01 maí, 2018 Fréttir, Leiksýning maí 1, 2018