Mikið er um að vera í Leikhúsinu þessa dagana. Fyrir utan Stuttverkahátíð NEATA sem kom óvænt í fang félagsins og fór fram í Leikhúsinu um síðustu helgi, standa nú yfir æfingar á Elskhuganum eftir Harold Pinter. Leikstjóri er Örn Alexandersson en leikarar eru Anna Margrét Pálsdóttir og Arnfinnur Daníelsson. Stefnt er að frumsýningu í lok mánaðarins. Þá eru að hefjast æfingar á 4 leikþáttum sem stefnt er að sýningum á skömmu síðar. Þá eru ótalin barna- og unglinganámskeiðin sem hófust í byrjun september og standa fram í lok nóvember. Þar eru annarsvegar börn á aldrinum 11-12 ára og einnig er námskeið í gangi fyrir 13.-16 ára unglinga.
